Alla Itolae Nusa 37
Hoko Yakupe irue me tape Kanane me amai Isake eni tapele.
Meije alenake loko Yakupe eni anubuaru. Kena Yusupe kwete beluke sa kena eni musuna butu esa lesini itu, piasare ikeu tapa kwalinisi kena ala pipi kai domba. Kwalinisi meru kwetela bei Silpa kai Bilha, Yakupe eni binaru esi tamata makerike. Kena ileu lomei luma inanu kwalinisi ete amai le esi lepa tiae etei kai esi ono neune.
Israele ioki Yusupe lesi bei kwetela maketaru le Rahela iruele Yusupe kena Yakupe intua peneka. Hoko iulake ono lapu nanuke beluke misete titinai ete Yusupe.
Eleki kena kwalinisi selu amai oki Yusupe lesi beisi hoko laleisu tiakeni, kai esi suka lepa kaini mimise mo.
Kena petu sae me Yusupe ikmani be kena pususi me ndinu esi lo gandume eleki eni gandume ekele mpe kla yo kwalinisi gandume keholini kai utatu bei eni gandume roma tapele. Kena ialenake kmani mere ete kwalinisi hoko laleisu tiakeni kai esi beteke lokoi be,
“Abetinake aono kamale ete ami kai apletae ami o?”
Hoko laleisu tiakeni titinai.
[tolong lihat ayat sebelumnya]
[tolong lihat ayat sebelumnya]
[tolong lihat ayat sebelumnya]
Eleki Yusupe ikmani suike be iselu lematai, bulane kai kmale butu esa lesini esa utatu lokoi roma tapele. Kena ialenake kmani mere ete amai kai kwalinisi, hoko amai lakeni kai ibeteke be,
“Amu kmani saisa ele mere? Abetinake au, inamu kai kwalimu ami tatu lokomu roma tapele o?”
[tolong lihat ayat sebelumnya]
Eleki kwalinisi laleisu tiakeni titinai po amai noake kmani mere me lalei rame.
Kena petu sae me Yusupe kwalinisi keu ala amaisi pipi kai dombaru tehaike Sikeme.
Eleki Israele iulake Yusupe be,
“Akeu loko kwalimusi.”Yusupe iombe,
“Yele ama.”Eleki Israele ibeteke be,
“Akeu selu be kwalimusi kai pipia kai dombaru mise pibe mo. Eleki aleu beteke ete au.”
Eleki Yakupe iulake Yusupe ikeu bei Hebrone lorau Sikeme. Hoko Yusupe ikeu ne.
Kena inikwa loko kwalinisi me Sikeme isupu kwalinisi mo po itetue mokwai sae me, eleki mokwai mere itneu be,
“Anikwa loko sia?”
Eleki Yusupe iombe,
“Au nikwa loko kwalikusi le esi ala pipi kai domba. Hoko arekwasi, o?”
Mokwai mere ibeteke be,
“Esi keu bei meije peneka. Au lene esi beteke loko lomai be, esi keu lori Dotane.”
Hoko Yusupe ikeu rame loko kwalinisi ndete Dotane, eleki itetue kwalinisi ete mere.
Kena Yusupe iroma kwalinisi mosa, kwalinisi selui bei laukwe esi renai le ialike lapu misete hoko esi lupuke lomai kai teu lepate esa kena esi bunui.
Eleki esi beteke loko lomai be,
“Selu, tamata maka kmanire iluake.
Mai ite bunui leke ite poi lope kena prigi nsekile meije. Namake ite beteke be binatanaru ubunui. Leke tatike pine ite selu be eni kmaniaru ono elika.”
Kena Rubena ilene be kwalinisi lepa ele mere hoko ibeteke be,
“Ite bunui yake.”
Elekai Rubena ibeteke be,
“Ite ono lalakwe tetu beini yake po ite poini lope kena prigi nsekile meije.”
Rubena laleije ele mere leke ileuke Yusupe loko amai.
Eleki kena Yusupe iroma kwalinisi esi kerikeni kai esi lesu eni lapu nanuke misete rebe ialikele.
Eleki esi lihini kai esi poi lope kena prigi nsekile mere.
Eleki kena esi rue kane esi selu tamata maka abeli bei Gileate esi keri esi taneiaru kena untaya lopai Mesire kena esia belielu. Taneia meru: rampa oowani, balsame kai kemenyane.
Eleki Yehuda ibeteke loko kwalinisi be,
“Ite bunui kai bunike eni lalakwe esi untune sasaisa ete ite mo.
Mai ite abeleini ete tamata maka abeliaru. Ite bunui yake le ile lekwe iteki kwali.”
Eleki kwalinisi lene lokoi neka.
Eleki kena tamata maka abeliaru esi lia, Yusupe kwalinisi sirieni bei prigire eleki esi abelieni etesi kena kepene perake matai butu lua. Eleki esi keri Yusupe lopai Mesire.
Eleki kena Rubena ileu me prigire iselu lope prigi nsekile mere Yusupe ime moneka eleki ikahi eni lapune le kaplalei kai laleije noai titinai le ibetinake kwalinisi bunu Yusupe peneka.
Ileu loko kwalinisi kai ibeteke lokosi be,
“Yusupe ime prigi laleije moneka hoko au beteke saisa ete amare?”
Eleki Rubena kai kwalinisi bunu pipi inai kai esi lutu Yusupe eni lapu nanuke kena esi lalakwe leke amasi rekwa isupu bunu peneka.
Eleki lapu nanuke misete mere esi ulake betele ete Yakupe kai beteke etei be,
“Meije ami tetuele. Ama aselu mina be meije amu anare eni lapu nanuke pibe mo.”
Kena Yakupe iselu lapu nanuke mere, irena be mere Yusupe eni lapu nanuke eleki inulu kai ibeteke be,
“Tinai, meije auku anare eni lapu nanuke. Hoko binatanaru ukanei peneka. Ado! Auku anare imata pene binatanaru ukahini.”
Hoko Yakupe inulu rame le lalei noa Yusupe kuate kai ialike lapu tiae kai pela petu irani lokoi.
Pusue eni nanae mokwai kai bina esi umaukeni po isuka mo kai ibeteke lokosi be,
“Au rani eti au mata lokoi.”
Yakupe laleije noa Yusupe rame ele mere.
Eleyo mpai Mesire, tamata maka abeliaru esi abelie Yusupe ete tamata Mesire sae eni nane Potipare, elake ete tamata rebe esi raka kamale. Tamata Mesire esi kotie kamale, Pirone.